MIZO HMING HI

Mizo hming hi chu buaithlak ve angreng deuh chu a ni, a bik takin sâp hming neih tel pheichuan a buaithlak zual emawni tih tur ani. Sâp ngaisang vetho chhungkua aṭangin kanlo piang ve hlawl a, paté-a ten David ni rawhse tiin duh êm êm in sâphming min han phuahsak a, hmingpumah lah, nuté-i ten mumang meuha hmu hiâlin 'Lalramenga' ni rawhse antia duhtakin min han phuah a. Ka nickname lah hi 'Adea' tihte ani ta daih a, nickname hrelo ho hnena 'David-a' kani tia ka introduce lahin, 'Devit' ti ten min ko leh mai mai lawi a. Vairam kan awm ve a, tunge i hming min tia, "David ka ni" ka'n ti a, Christian hming anih bâkah, vai ho lah hian Sâp hmingah pawh sâp lamdân anga 'Dayvid' han tihkual vêl thiam bîk heklo. Ṭhenrualte aîmahin an lam ṭhing emaw tihtur hian min han ko leh a. Chutah "Enge i hmingpum" an tia, "Lalramenga (David Lalramenga) ka ni" ka'n tia, ka surname emaw tiin, "I surname chu lam ava har ve" antia, "Ka surname anilo, ka middle name ani" katia, an nuih hi a za riau zêl lehnghal a, hnamhming nen hian han introduce dawn ila Ralte Lelhchhun ani lehduah bawk si a. Chuvangin ka hming hi mawi ti viau mah ila a buaithlak ve na riau hi a awm tlat mai a. Tunlâiah phei chuan hming tawifel ât duh siin, profile information ah te hian, middle name te kan dahkân thul, surname ziahna turah Lalramenga tihte kan ziak leh ang nulh bawk a. 

Hmingphuah dan system hi inenlet deuh chu kan la ngai maithei a ni. A hawiharh záwnga kan kal zêl phei chuan thil systematic lo lutuk a kal rêng rêng hi chu, tluang ve viau mahse a tawpah alo buaithlak ṭhin a. Hei, a ram fang zau deuh Rema Chhakchhuak te pawn an hming an thlak rem rum mai ani.

Sâp hming neih te hi sâp ram kal hun atan alo ṭangkai phian maithei tihchu ka hriat ani lémlova, mahse; mahni hnam nihna pawchhuak ve si, tawi fel si, khawvêl ruala pên theihna hming hi kanla mamawh tlâng hian ka ring ru tlat. Sap ho angin thil rêng rêng hming phuah zung zung hi harsatlo ila chu kan ṭawng pawh hi a hausa zual sawt ang mawle. English hausak chhan pawh, a hmang tu ten thil hming phuah zung zung an harsatloh vâng mai mai alawm. Hei ṭhiante bulah "David Lalramenga" ka han inti chu, vai ho hian lamthiamlo mahse mawi anti ve viau tho ni ngei tur ani, pakhat phei chuan ka hminghnuhnung kher hian mi koh hi a tum ve lehnghal a, "Lal-ramain-ga" tih hian mi ko mi ko ve mai a. Pawn lamah nuichhuak lo mah ila chhungrilah hian "Nuih hi a za ru zo vek zel mai ni".