LIANDOVA

 Liandova kha alo fing mange, khatia Lêrsia an siâl a thlantîr dawn a, Lêrsia ṭhenawm pitar àn râwn chat mai kha a nachâng hi alo hria hi ka tia lawm. 

Khatiang hun tepter inthlahna thilpêk dawn dâwnah phei chuan tihchi tak tur hi ani. Hun chu neih belh deuh phei se, amah Liandova ngêi khan a thlan hmain Lêrsia Se hung te kha va bêlchiangin ava tlawh rûk zeuh zeuh ka ring tlat. 

Tikhan tu emaw upa leh fing zawk rawn lêm lo khân a sechal ki lian leh a bûkrit hmel deuh, a thau ṭha ber kha va pâwng thlan ringawt ta se, Lêrsia khan, "Ehe nang tlangvâltê chu i fel ná a, i va mawl rilru reuh ve le, lehkhabu akâwm landân aṭanga, a chhûngthu ngaihnawm leh ngaihnawm loh tur rêlthlu ringawt mi i ni maw" ati rilru neuh neuh lovang tih a sawi theih miahloh.

Tin, ava râwn pitarte pawh kha fakawm ru deuh ani, ṭhenawmte thilṭha neih alo hre khiau tekha a fakawm tlat. Lersia ṭhenawm hnâidang leh a khawnbawl leh upa te pawn' a an hriatpui mangloh tur thil alo hrechat mai khan 'mi râwntlak' anih zia a lantir chiang hle. Pitar zawk kha rawn lovin a ṭhenawm chiah a pa pakhat pâu peih satliah thil inti hre deuh, kum kha leh chen Lal ṭhenawma cheng vetho si a Lal sechi ṭha neih pawh hre ve dêrlo kha va rawn nulh ta se. Liandovate unau kha lawmin an khi haw vur vur kher teuhlo.